Hridaysparshi Kavita

🌅पहाट🌄

पहाट म्हणजे पुन्हा नव्याने बहरलेली सोन्याची किरणे,

पुन्हा नव्याने पडलेले दवबिंदु,

पुन्हा निर्सगाने स्वच्छ केलेला श्वास,

पुन्हा कोकिळेच्या स्वरात मुग्ध झालेली भुपाळी।

पहाट म्हणजे पुन्हा मनाने धरलेली आस,

शुन्यातुन विश्व उभे करु पाहाणारी चैतन्याची ती आरास,

पहाट म्हणजे नवी स्वप्न, नवी उम्मेद,

अनेक अपयशानंतर यशशिखर गाठणारे ते ब्रिद।

पहाट म्हणजे विरहाच्या दाट अंधाराला दुर सारणारी प्रेमाची किरणे,

पुन्हा मनात वाजणारा प्रितीचा राग,

नव्याने हवासा वाटणारा प्रिय व्यक्तिचा सहवास,

केस सावरता सावरता, सावरलेले ते प्रेम।

पहाट म्हणजे भुकंपाने उदध्वस्त झालेल्या धरणीवर फुटलेले नवे अंकुर,

निराशेने खचलेल्या धरणीची स्थिर होण्याची ती धडपड,

पुन्हा गवसलेली नवचेतना,

प्रकाशवलयांनी तेजोमय झालेल्या आशा नि अंधारासोबत विरुन गेलेल्या निराशा।